افغانستان؛ د فرصتونو په منځ کې د ناکامیو دردناک تکرار – شیخ القرآن مولانا عبدالسلام عابد

افغانستان په تېرو لسیزو کې څو ځله داسې پړاوونو ته رسېدلی چې د جګړې د پای، ملي یووالي او یوه باعزته او باثباته دولت د جوړېدو هیله پکې راټوکېدلې ده. مولانا عبدالسلام عابد په دې رساله کې همدغو فرصتونو ته ورګرځي او پوښتنه کوي چې ولې له لویو قربانیو او سیاسي بدلونونو وروسته بیا هم د سولې او دولت جوړونې بهیر کمزوری پاتې شوی دی. د رسالې له مخې، زموږ یوه اساسي ستونزه دا ده چې د نظامونو د نسکورولو تجربه مو ډېره، خو د نظامونو د جوړولو، د مخالف د منلو او د ګډ ژوند د اصولو تجربه مو محدوده ده. مولانا عبدالسلام عابد د افغانستان بېلابېل سیاسي پړاوونه په یوه واحده تله نه تلي، بلکې د هرې دورې لاسته راوړنې او نیمګړتیاوې جلا ارزوي. امنیت د دولت لومړنی ضرورت ګڼل شوی، خو ورسره ټینګار کېږي چې د خلکو اعتماد، عدالت، مشوره، علم، اقتصادي وده، اداري اصلاح او ملي تفاهم هغه بنسټونه دي چې امنیت ته دوام ورکوي. په همدې اساس، دا رساله یوازې د تېرو ناکامیو نقد نه دی، بلکې د راتلونکې لپاره د سیاسي بلوغ، زغم، ملي تفاهم او مسؤلانه دولت جوړونې بلنه هم ده.